Facebook32

كشّاف الخبرات

B4787e150d5efe0627e16f07109df29b.png?d=http%3a%2f%2fkashaaf.com%2fkashaaf_logo

إبن بطوطة
72 نقطة 2
الهجرة للدنمارك
عدد المشاهدة
1289


عايز أشتغل او اهاجر اوروبا .. بس معرفش ازاي اعمل كده .. وتقريبا كده الموضوع مستحيل والا كان كل المصريين هاجروا واشتغلوا في اوروبا !!!

الكلام ده مش صح .. اوروبا بعد بحثي خلال الكام شهر الي فاتوا وجدت انها اسهل الدول الي تقدر بسهولة تهاجر اليها لو كنت Skilled Worker يعني عامل متميز يتمتع بخبرات هم محتاجينها .. كلامي ده بيشمل مهندسين و دكاتره و مهندسي برمجيات وعلماء و متميزين في مجالاتهم ايا كانت ...

انا هنا هغطي ٣ طرق من الي اعرفهم علشان تعرف تهاجر اوروبا .. طريقه منهم تنفع لاي دولة اوروبيه .. وطريقتين ثانيين تسمح لك تهاجر الدنمارك.

1- الطريق الاول(Blue Card):

الهدف منه ان دول اوروبا تستقطب العقول النيره واصحاب الخبرات و الي ليهم مكان عمل عندهم .. فكرته انك تقدر تحصل علي ٤ سنوات اقامه في اوروبا و ده بيشمل زوجتك واولادك .. الاقامه بتديك حق المعيشه و العمل في اوروبا واكيد طبعا الدخول والخروج من دول اوروبا في اي وقت.

الBlue Card بتاخدها من دولة اوروبيه معينه الي بتقدم فيها وبعد سنه ونص من الاقامه الاولي بيبقي مسموحلك تنقل عملك لاي دولة اوروبيه ثانيه .. وبعد ٥ سنوات تقدم علي اقامة دايمه ..

شروط انك تاخد الBlue Card هو حاجه واحده بس .. انك يكون عندك عقد عمل في الدوله الي هتقدم فيها براتب شهري ٤ الاف يورو .. ولو كنت في احد مجالات الي عندهم فيها نقص خبرات زي: (scientists, mathematics, engineers, doctors and IT- skilled workers) مش محتاج غير عقد براتب شهري ٣ الاف يورو.

المرتبات دي لو قارنتها بمتوسط دخل الفرد في مصر هتلاقيها عاليه جدا .. بس لو قارنتها بالدخول في اوروبا هتلاقيها اقل من المتوسط ويادوب تسمح لك تعيش عيشه هنية في البلد .. لان جزأ كبير منها بيستقطع كضرائب.

علشان تقدم علي الBlue Card محتاج:
- جواز سفر مصري ساري.
- صوره (35mm x 45mm) بخلفية بيضاء.
- عقد العمل.
- وتملي الApplication بتاع التقديم.

2- الطريقة الثانيه(Danish Green Card):
الهدف منه ان الدنمارك تعرف تجيب Highly skilled workers للدنمارك يساعدوا علي نمو الاقتصاد و تلبية حاجة سوق العمل .. فكرته انك تقدر تحصل علي ٣ سنوات اقامة في الدنمارك وده اكيد بيشمل زوجتك واولادك .. الاقامه بتديك حق المعيشه والعمل في الدنمارك والتنقل بين كل دول اوروبا بحرية تامه .. بعد انتهاء الاقامه بتجددها لمدة ٤ سنوات اخري بناءا علي حالة عملك .. "تعمل او لا تعمل".

بعد مضي ٥ سنوات من اقامته في الدنمارك تقدر تقدم علي اقامة دائمة ..

علشان تقدم علي الجرين كارد مش محتاج عقد عمل وده الفرق عن الBlue Card كل الي محتاجه انك تحسب معايا النقاط دي وتجيب Score يساوي او اعلي من ١٠٠ نقطه ..
نظام النقاط:
- ١٥ نقطه لسن تحت ٣٤ سنه و ١٠ نقاط من ٣٤ ل٤٠ سنه.
- ٥ نقاط لو عشت/اتعلمت/اشتغلت سنه في اي دوله اوروبيه و ١٠ نقاط لو كانوا ٣ سنوات فاكثر.
- ١٠ نقاط لو اشتغلت كباحث او في احد مجالات العمل المطلوبه وفيه قصور في الدنمارك بين سنه وسنتين، و بيكونوا ١٥ نقطه لاكثر من ثلاث سنوات.
علشان تعرف المجالات الي فيها عجز في الدنمارك هتلاقيها هنا:
http://www.nyidanmark.dk/…/w…/positivelist/positive-list.htm

- لك ٢٠ نقطة لو اتعلمت في جامعه نظام التعليم بتاعها انجليزي او اتعلمت في جامعة اوروبيه او عرفت تجيب Score ٦ في اختبار الIELTS. وتقدر تاخد نقد زياده علي اللغات الثانيه زي الالماني والفرنساوي والدنماركي و النرويجي و السويدي و ...

- لك ٣٠ نقطه لو معاك بكالريوس ناتج عن ١٦ سنه تعليم عن الاقل ولك ٥٠ نقطه لو معاك ماجستير ناتج عن ١٧ سنه تعليم (ماجستير سنه واحده) و ٦٠ نقطه لو معاك ماجستير ناتج عن ١٨ سنه تعليم (ماجستير سنتين) .. ولك ٨٠ نقطه لو معاك PHD.

- ضيف علي نقاط التعلم الي فاتت دي ١٠ نقاط لو كان تعليمك في احد المجالات الي فيها نقص في العماله الي وضحت ليها لينك قبل كده.

- لك نقاط علي حسب ترتيب جامعتك كالتالي:
Top 400: 5 points Top 200: 10 points Top 100: 15 points

لو حسبت نقاطك وطلعت ١٠٠ او اكثر كل الي محتاجه:
- جواز سفر مصري ساري.
- صوره (35mm x 45mm) بخلفية بيضاء.
- تملي الابلكيشن وتقول ازاي انت مقتنع انك تقدر تجيب Score ١٠٠ نقطه.
- اهم حاجه كشف حساب يوضح ان معاك فلوس تغطي اقامتك في اول سنه عمل في الدنمارك بيكون في حدود ٨٥-١٠٠ الف جنيه مصري.

كشف الحساب ده مش هتصرف منه ومش محتاج منه اي حاجه غير انك تقدم بيه وبعد ماتجيلك الجرين كارد رجع الفلوس لمكانها سواء كنت مستلفها او واخد بيها قرض او مشغلها في Business.

بعد ماتاخد الجرين كارد الدنماركي .. تقدر في اي وقت تسافر اي دوله اوروبيه و تبدأ تدور علي عمل بسهولة في الدنمارك او حتي خارج الدنمارك بس لو لقيت شغل خارج الدنمارك هتضطر ساعتها تقدم علي البلو كارد بالعقد بتاع الشغل الجديد علشان يبقي ليك حق العمل في الدوله الي هتشتغل فيها .. لما لو لقيت عمل في الدنمارك فينع تبدأ شغل من ثاني يوم الصبح ..

في طريقه ثالثه علشان تدخل الدنمارك وتشتغل فيها:
- الطريق الثالثه (Positive List):
شايف اللينك الي انا حطيته فوق الي بيوضح المجالات الي فيها قصور في السوق الدنماركي ومحتاجين ايدي عامله فيها .. لو عرفت تجيب اي عقد عمل في احد المجالات دي في الدنمارك تقدر تقدم علي Positive List Schema وتبقي في الدنمارك خلال شهر-شهرين .. المشكلة ان لو عقدك ده راح لاي سبب وبطلت تشتغل .. اقامتك مش بتكون بفترة زمنية محدده زي بقية الطرق وانما بتكون خلال فترة عملك بس + ٦ شهور سماح تدور علي شغل ثاني قبل ماتضطر ترجع بلدك ..

------------------------------------
فيه طرق ثانيه علشان تهاجر اوروبا وتشتغل فيها .. منها انك تاخد منحة ماجستير او دكتوراه في اي دوله اوروبيه وبعدها بيبقي سهل انك تلاقي شغل وتكمل حياتك هناك .. انا معنديش اي خبره في الموضوع ده الا في نظام التعليم الجامعي البريطاني بحكم اني درست سنه في بريطانيا "ماجستير" و فاهم النظام التعليمي بتاعهم وقوانين الهجره ودي لها موضوع ثاني ..

فيه تفاصيل عن الBlue Card هنا:
http://www.eubluecard.nl/eu_blue_card

وفيه تفاصيل بكل صغيره وكبيره عن الGreen Card هنا:
http://www.nyidanmark.dk/…/greencard-s…/greencard-scheme.htm

وفيه تفاصيل عن الPositive List Schema في الدنمارك هنا:
http://www.nyidanmark.dk/…/w…/positivelist/positive-list.htm

الموضوع سهل جدا من حيث الفهم والقوانين وحقوقك وواجباتك .. اي حد بيعرف يقري انجليزي هيعرف يدخل المواقع دي ويفهم النظام .. الصعب فعلا انك تكون حد الدول دي محتاجاه فعلا ..

اخر حاجه بمناسبة اللغه .. معظم الدول دي مش بتحتاج اي لغه زياده في التقديم عن الانجليزي .. بس بطبيعة الحال اول ماهتوصل هتفهم انك محتاج اللغه علشان تزود فرص عملك و تطور نفسك و الاهم علشان تعرف تقدم علي جنسية او اقامه دائمه بعد السنوات المطلوبه .. معظم الدول دي بتوفر كورسات لغه مجانيه علي مستوي عالي جدا للاجانب بمجرد حصولك علي الاقامه ودي اخر حاجه المفروض تقلق عليها 

الخبرة منقولة من طارق السمني

الاماكن المرتبطة

  • سفارة الدنمارك

  • التصنيف

    • *سفر وهجرة  


    December 14, 2014 | إطبع

    Question_mark استفدت من الخبرة دي؟ فيد غيرك بتجربتك وخبرتك في الدنيا من هنا
    معلومة زيادة x
    عشان الدنيا مش واضحة وعشان ناس كتير ماتعرفش عملنا... كشَّاف خبرات كل المصريين في أي حاجة وعن أي مكان حتتجمع هنا للأبد و متاحة للجميع

    التعليقات



    تسجيل الدخول x
    إشترك الآن في موقع كشاف مصر